“தேசிய மொழி இந்தி தெரியவில்லையா?” என்று “சொமேட்டோ” ஊழியர் கேட்டதால் பரபரப்பு

“Don’t know the national language Hindi?” Excitement as the “Somato” employee asked

19.10.2021
“தேசிய மொழி இந்தி தெரியவில்லையா?” என்று “சொமேட்டோ” ஊழியர் கேட்டதால் பரபரப்பு ஏற்பட்டது. தங்களது வாடிக்கையாளர் சேவை மைய ஊழியரின் நடவடிக்கைக்கு சொமேட்டோ நிறுவனம் வருத்தம் தெரிவித்துள்ளது.

உணவு டெலிவரி

தமிழ்நாட்டை சேர்ந்த விகாஷ் என்பவர் ஜொமேட்டோவில் உணவு ஆர்டர் செய்துள்ளார். ஆனால், அவர் ஆர்டர் செய்த உணவு முழுவதுமாக கிடைக்காததால், ஜொமேட்டோ ஆப் மூலம் வாடிக்கையாளர் சேவை மையத்தை தொடர்பு கொண்டு தனது பணத்தை திருப்பி அளிக்கும்படி கேட்டுள்ளார்.
அப்போது அவருக்கு பதில் அளித்த சேவை மைய அதிகாரி, நீங்கள் உணவு ஆர்டர் செய்த உணவகத்தை தொடர்பு கொண்டோம். ஆனால், மொழி பிரச்னையால் எங்களால் இது தொடர்பாக பேச முடியவில்லை என பதிலளிக்கிறார். அதற்கு விகாஷ் தமிழ்நாட்டில் இருந்து கொண்டு தமிழ் தெரியாமல் இருந்தால் எப்படி. தமிழ் தெரிந்த ஒருவரை நியமிக்க வேண்டாமா? நீங்கள் உணவகத்தை தொடர்பு கொண்டு பணத்தை திரும்ப பெற்று தாருங்கள் என கேட்டுள்ளார். அதற்கு பதிலளித்த அதிகாரி தேசிய மொழி இந்தி. அதை அனைவரும் தெரிந்து வைத்திருக்க வேண்டும் என தெரிவித்தார்.

டுவிட்டர்

மேலும் சேவை மைய அதிகாரிக்கும், தனக்குமான உரையாடல்களை விகாஷ் டுவிட்டரில் அந்நிறுவனத்தை டேக் செய்து பதிவிட்டார். உடனடியாக சமூகவலைதளங்களில் ஜொமேட்டோ நிறுவனத்திற்கு எதிராக “சொமேட்டோ வை புறக்கணிப்போம்” என்று ஹேஸ்டேக் டிரெண்டிங் ஆனது.

மன்னிப்பு

இந்நிலையில்,தங்களது வாடிக்கையாளர் சேவை மைய ஊழியரின் நடவடிக்கைக்கு சொமேட்டோ நிறுவனம் வருத்தம் தெரிவித்து அவரை பணியிடம் நீக்கம் செய்து விட்டதாகவும் அறிக்கை ஒன்றை வெளியிட்டுள்ளது.

அந்த அறிக்கையில் கூறப்பட்டிருப்பதாவது:-

எங்கள் வாடிக்கையாளரின் சேவை முகவரின் நடத்தைக்கு வருந்துகிறோம். வேற்றுமையில் ஒற்றுமை என்ற நம் தேசத்தின் மாறுபட்ட கலாச்சாரத்தின் மீதான எதிர்க்கருத்தை வாடிக்கையாளரிடம் காட்டிய ஊழியரை பணிநீக்கம் செய்துள்ளோம். பணிநீக்கம் என்பது சரியான நெறிமுறை என நம்புகிறோம். மேலும் மக்களின் உணர்வுகளுக்கு எதிராக கருத்தை பகிரக்கூடாது எனத் தெளிவாக நாங்கள் எங்கள் முகவர்களுக்கு தொடர்ந்து பயிற்சி அளிக்கிறோம்.

இந்த வாடிக்கையாளர்‌ சேவை முகவரின்‌ அறிக்கைகள்‌ மொழி அல்லது சகிப்புத்தன்மை குறித்த நிறுவனத்தின்‌ நிலைப்பாட்டைக்‌ குறிக்கவில்லை. ஒரு நிறுவனமாக, நாங்கள்‌ முழு பயன்பாட்டிற்காக தமிழ்‌ செயலியை உருவாக்குகிறோம்‌. நாங்கள்‌ ஏற்கனவே மாநிலத்திற்கான தமிழில்‌ சந்தைப்படுத்தல்‌ முயற்சிகளை உள்ளூர்மயமாக்கியுள்ளோம்‌ (எ.கா. நாங்கள்‌ மாநிலத்திற்கான உள்ளூர்‌ பிராண்ட்‌ அம்பாசிடராக அனிருத்தை தேர்வு செய்துள்ளோம்‌), மேலும்‌ கோயம்புத்தூரில்‌ ஒரு உள்ளூர்‌ தமிழர்‌ கால்‌ சென்ட்டர்‌ / சர்வீஸ்‌ சென்ட்டரை உருவாக்கும்‌ பணியில்‌ உள்ளோம்‌.

உணவு மற்றும்‌ மொழி ஒவ்வொரு மாநிலத்தின்‌, கலாச்சாரத்தின்‌ இரண்டு அடித்தளங்கள்‌ என்பதை நாங்கள்‌ புரிந்துள்ளோம்‌. அவை இரண்டையும்‌ நாங்கள்‌ முழுமையாக உணர்ந்துள்ளோம்‌ என மீண்டும்‌ தெரிவித்துக்‌ கொள்கிறோம்‌.

இவ்வாறு அதில் கூறப்பட்டுள்ளது.