ஐடிபிஐ வங்கி பங்கு விற்பனை-ராகுல் குற்றச்சாட்டும் நிர்மலா சீதாராமன் பதிலும்

IDBI Bank stake sale: Rahul’s allegation and Nirmala Sitharaman’s response

30.10.2026

கடந்த அக்டோபர் 14 அன்று, கோடீஸ்வரர் பிரேம் வல்சா தலைமையிலான கனடிய நிறுவனமான ஃபேர் ஃபாக்ஸ் ஃபைனான்சியல் ஹோல்டிங்ஸுக்கு, ஐடிபிஐ வங்கியின் 60.72 சதவீத பங்குகளை விற்பனை செய்வதற்கு அரசு ஒப்புதல் அளித்தது.

இந்த ஒப்பந்தத்தின் மதிப்பு சுமார் ரூ. 53,000 கோடி ஆகும். ஃபேர் ஃபாக்ஸ் நிறுவனம், அரசின் 30.48 சதவீத பங்குகளையும் (ரூ.26,620 கோடி) எல்ஐசியின் 30.24 சதவீத பங்குகளையும் (ரூ.26,440 கோடி) வாங்குகிறது.

அந்நிறுவனம் ஒரு பங்கின் விலையை ரூ. 81 என நிர்ணயித்துள்ளது. இந்திய ரிசர்வ் வங்கியின் ஒப்புதலுக்கு உட்பட்டு, இந்த நிதியாண்டிற்குள் இந்த பரிவர்த்தனையை முடிக்க மத்திய அரசு நடவடிக்கை எடுத்து வருகிறது.

இந்த ஒப்பந்தத்தின் மதிப்பீடு மற்றும் நடைமுறைகளில் பெரும் முறைகேடுகள் நடந்ததாக வங்கி தொழிற்சங்கங்கள் குற்றம் சாட்டியதைத் தொடர்ந்து, முதலீடு மற்றும் பொதுச் சொத்து மேலாண்மைத் துறை (DIPAM) ஒரு விளக்கத்தை வெளியிட்டது.

ஒதுக்கீட்டு விலையில் எந்த மாற்றமும் இல்லை என்றும், சுதந்திரமான முகமைகளால் நிர்ணயிக்கப்பட்ட நியாயமான விலையான ரூ.75.99-ஐ விட அதிகமான விலையான ரூ.81-க்கு ஃபேர் ஃபாக்ஸ் இந்த ஒப்பந்தத்தைப் பெற்றிருந்தது என்றும் DIPAM விளக்கம் அளித்தது.
இந்த முடிவுக்கு எதிராக எதிராகப் போராடி வரும் வங்கி ஊழியர்களுக்கு தனது ஆதரவை வெளிப்படுத்தும் வண்ணம் ராகுல் காந்தி திறந்த கடிதம் ஒன்றை எழுதியுள்ளார்.

அதில், “பொதுத்துறை வங்கிகள் காங்கிரஸ் ஆட்சிக் காலத்தில் நிறுவப்பட்டன, ஆனால் மோடியின் ஆட்சியில் அவை அனைத்தும் விற்கப்படுகின்றன.

பொதுத்துறை வங்கிகள் விற்பனை செய்யப்பட வேண்டிய சொத்துக்கள் அல்ல. அவை மக்களின் பணத்தைப் பயன்படுத்தி நாட்டிற்கு சேவை செய்வதற்காக உருவாக்கப்பட்ட நிறுவனங்கள்.

ஏழு ஆண்டுகளுக்கு முன்பு நஷ்டத்தில் இருந்த அந்த வங்கி, அதன் ஊழியர்களின் கடின உழைப்பின் காரணமாக, கடந்த ஆண்டு ரூ.9,000 கோடிக்கும் அதிகமான லாபத்தை ஈட்டிய ஒரு நிறுவனமாக உருமாறியுள்ளது.

தற்போது மத்திய அரசு மற்றும் ஆயுள் காப்பீட்டுக் கழகம் இணைந்து 95 சதவீதம் வசம் வைத்திருக்கும் வங்கியின் உரிமையானது, பங்குகள் விற்பனை செய்யப்படுவதன் மூலம் வெறும் 34 சதவீதமாக வீழ்ச்சியடையும்.

2003ஆம் ஆண்டில், வங்கியில் குறைந்தபட்சம் 50 சதவீதப் பங்குகளை அரசு தக்கவைத்து கொள்ளும் என்று அப்போதைய அரசு நாடாளுமன்றத்திற்கு உறுதியளித்திருந்தது.

நாடாளுமன்றத்திற்கு அளித்த வாக்குறுதியை மீறுவது மக்களுக்குச் செய்யும் துரோகம்.

வங்கியின் தனியார்மயமாக்கலால், பட்டியல் சாதியினர், பழங்குடியினர் மற்றும் இதர பிற்படுத்தப்பட்ட வகுப்பினருக்கான அரசியலமைப்பு ரீதியான இட ஒதுக்கீட்டுப் பலன்கள் முற்றிலுமாக நீக்கப்படும்.

மேலும், ஊழியர்களின் பணிப் பாதுகாப்பும், முதலீட்டாளர்களின் நலன்களும் ஆபத்தில் சிக்கும்” என எச்சரித்துள்ளார்.

வங்கியின் தனியார்மயமாக்கல் நடவடிக்கைகளுக்கு எதிரான ஊழியர்களின் நியாயமான போராட்டத்திற்கு காங்கிரஸ் உறுதுணையாக நிற்கும் என்று ராகுல் காந்தி உறுதியளித்துள்ளார்.

ராகுல்காந்தியின் குற்றச்சாட்டுக்கு மத்திய நிதியமைச்சர் நிர்மலா சீதாராமன் பதில் கொடுத்துள்ளார். இது தொடர்பாக எக்ஸ் பக்கத்தில் நிர்மலா சீதாராமன் கூறியிருப்பதாவது:-

காங்கிரஸ் வங்கிகளையும் நிதி நிறுவனங்களையும் எவ்வாறு தங்கள் சொந்த சொத்துக்களை போலப் பயன்படுத்தியது என்பதையும், முறையான கடன் வழங்கும் விதிமுறைகளைப் புறக்கணித்து, தங்கள் விருப்பப்படி கடன் வழங்குமாறு வங்கி ஊழியர்களுக்கு அழுத்தம் கொடுத்தது என்பதையும் நாம் அனைவரும் அறிவோம்.

சில உதாரணங்களை இங்கே குறிப்பிடுகிறேன்:
1957-ல், காங்கிரஸ் தலைவர்களின் செல்வாக்கை பயன்படுத்தி ஹரிதாஸ் முந்த்ரா (Haridas Mundra) என்பவர் எல்.ஐ.சி (LIC)-யிடமிருந்து பணம் பெற்றார்.

1976-ல், சஞ்சய் காந்தியின் வட்டாரத்துடன் தொடர்புடைய ஒரு நிறுவனத்திற்கு கடன் வழங்கும் நிபந்தனைகளை தளர்த்துமாறு விடுக்கப்பட்ட அரசியல் அழுத்தத்தை ஏற்க மறுத்ததற்காக, இந்திரா காந்தி தலைமையிலான அரசு, அப்போதைய எஸ்பிஐ (SBI) தலைவர் ஆர்.கே. தல்வாரைப் பதவியிலிருந்து நீக்கியது.

மாருதி (Maruti) நிறுவனத்திற்கு கடன் வழங்குமாறு சஞ்சய் காந்தி, சென்ட்ரல் பேங்க் ஆஃப் இந்தியா (Central Bank of India) வங்கிக்கு அழுத்தம் கொடுத்தார்.

இந்திரா காந்தி மற்றும் ராஜீவ் காந்தி ஆகியோரின் ஆட்சிக் காலத்தில் நிதித்துறை இணை அமைச்சராக இருந்த பி. ஜனார்த்தன பூஜாரி, 1980-களில் வங்கிக் கடன்களை வழங்குமாறு வங்கி ஊழியர்களுக்கு அழுத்தம் கொடுத்தார்.

ஐக்கிய முற்போக்குக் கூட்டணி (UPA) ஆட்சியில் அமைச்சராக இருந்த பவன் குமார் பன்சால், தனது குடும்பத்துடன் தொடர்புடைய வணிகங்களுக்கு கடன் வழங்குமாறு கனரா வங்கிக்கு (Canara Bank) அழுத்தம் கொடுத்தார்.

நாங்கள் பொறுப்பேற்றபோது, ஐடிபிஐ (IDBI) வங்கி மிகவும் மோசமான நிலையில் இருந்தது. ஏனெனில், காங்கிரஸ்காரர்களுடன் நெருங்கிய தொடர்பு கொண்ட வீடியோகான் (Videocon), வின்சம் (Winsome), ஏபிஜி ஷிப்யார்டு (ABG Shipyard), கிங்பிஷர் (Kingfisher) போன்ற பெரிய வணிகக் குழுக்களுக்குக் கடன் வழங்குமாறு ஐடிபிஐ வங்கி கட்டாயப்படுத்தப்பட்டிருந்தது. இவை வாராக் கடன்களாக மாறியதால், ஐடிபிஐ வங்கிக்கு பெரும் இழப்பு ஏற்பட்டது. இதை நாங்கள் கண்டறிந்தோம்.

பிரதமர் மோடி தலைமையிலான என்.டி.ஏ (NDA) அரசு, தொழில்முறை அணுகுமுறை, விவேகமான செயல்பாடுகள் மற்றும் 25,000 கோடி ரூபாய்க்கும் அதிகமான மூலதனத்தை மீண்டும் உள்ளீடு செய்ததன் (recapitalisation) மூலம் ஐடிபிஐ வங்கியை மீட்டெடுத்தது. தற்போது, ஐடிபிஐ வங்கி தனது அடுத்தகட்ட வளர்ச்சிக்கான பாதையில் உள்ளது.

ஐடிபிஐ வங்கியின் இந்த மூலோபாய மறுசீரமைப்பின் போது அனைத்து நடைமுறைகளும் முறையாகப் பின்பற்றப்பட்டன. இது குறித்து நாங்கள் நேற்று ஏற்கனவே தெளிவுபடுத்தியுள்ளோம்.

பிப்ரவரி 2024-ல் வெளியிடப்பட்ட ‘இந்தியப் பொருளாதாரம் குறித்த வெள்ளை அறிக்கை’யில் (White Paper on the Indian Economy), இது போன்ற பல மோசடிகள் மற்றும் பொருளாதார நிர்வாகச் சீர்கேடுகள் குறித்த கூடுதல் தகவல்கள் இடம்பெற்றுள்ளன.

ரஃபேல் விவகாரத்தில் நீங்கள் கூறிய பொய்கள் தோல்வியடைந்தன, அம்பலப்படுத்தப்பட்டன. நீங்கள் மன்னிப்பு கேட்க வேண்டிய சூழல் ஏற்பட்டது. இப்போதும் அதேதான் நடக்கப்போகிறது.

காங்கிரஸ் ஆட்சிக்கால வங்கி முறையில், செல்வாக்கு மிக்கவர்களுக்கு ஒரு தொலைபேசி வழி அணுகுமுறை (phonebook) இருந்தது. சாதாரண குடிமக்களுக்கோ கடுமையான விதிமுறைகள் (rulebook) இருந்தன. செல்வாக்கைப் பயன்படுத்தி கடன் பெறும் காலம் முடிந்துவிட்டது.

இப்போது சாதாரண மக்களும் எளிதாகக் கடன் பெற முடிகிறது. வங்கி ஊழியர்கள் மீது, தொலைபேசி அழைப்புகள் மூலம் கடன் வழங்க வேண்டும் என்ற அழுத்தம் இல்லை.

இவ்வாறு நிர்மலா சீதாராமன் தெரிவித்துள்ளார்.