தமிழ்நாடு மெர்கன்டைல் வங்கியின் 4 புதிய கிளைகள் திறப்பு

Opening of 4 new branches of Tamil Nadu Mercantile Bank

1.3.2026

இந்தியாவின் பழமையான மற்றும் முன்னணி தனியார் துறை வங்கிகளில் ஒன்றான தமிழ்நாடு மெர்கன்டைல் வங்கி, தமிழகத்தில் நான்கு புதிய கிளைகளைத் திறந்துள்ளது.

தூத்துக்குடியை தலைமையிடமாகக் கொண்டு இயங்கி வரும் நூற்றாண்டு கால வரலாற்றுப் பெருமை கொண்ட தமிழ்நாடு மெர்கன்டைல் வங்கி லிமிடெட் (TMB), தமிழகத்தின் முக்கிய நகர்ப்புற மற்றும் கிராமப்புற பகுதிகளில் தனது வங்கிச் சேவையை விரிவுபடுத்தும் நோக்கில் நேற்று நான்கு புதிய கிளைகளைத் தொடங்கியுள்ளது.

இதன்படி மயிலாடுதுறை மாவட்டத்தின் மேலையூர், புதுக்கோட்டை மாவட்டத்தின் பொன்னமராவதி, கள்ளக்குறிச்சி மாவட்டத்தின் சின்ன சேலம் மற்றும் மதுரை மாவட்டத்தின் சோழவந்தான் ஆகிய இடங்களில் புதிய கிளைகள் நேற்று முதல் செயல்படத் தொடங்கியுள்ளன. வலுவான விவசாயம், MSME மற்றும் வர்த்தகச் சூழல் கொண்ட பகுதிகளில் தனது விநியோக வலையமைப்பை வலுப்படுத்துவதன் மூலம் உள்ளூர் பொருளாதாரத்திற்கு ஆதரவளிப்பதே வங்கியின் முக்கிய நோக்கமாகும்.

வங்கியின் நிதிநிலை குறித்து Q3 FY26 முதலீட்டாளர் அறிக்கையின்படி, மொத்த வணிகம் ஆண்டு அடிப்படையில் 14.28% வளர்ச்சி கண்டு ₹1,07,470 கோடியாக உயர்ந்துள்ளது. இதில் கடன்கள் (Advances) 16.30% வளர்ச்சியுடன் ₹50,763 கோடியாகவும், வைப்பு நிதி (Deposits) 12.53% வளர்ச்சியுடன் ₹56,707 கோடியாகவும் அதிகரித்துள்ளன.

புதிய கிளைகள் அனைத்தும் “Phygital” முறைப்படி வடிவமைக்கப்பட்டுள்ளன; அதாவது, நேரடி வங்கிச் சேவையுடன் செயற்கை நுண்ணறிவு (AI) கொண்ட வாடிக்கையாளர் சேவை மையங்கள், மேம்படுத்தப்பட்ட மொபைல் பேங்கிங் மற்றும் டிஜிட்டல் பரிவர்த்தனை வசதிகள் ஆகியவற்றை இவை ஒருங்கிணைத்துள்ளன. தற்போது வங்கியின் மொத்தப் பரிவர்த்தனைகளில் 96.96% டிஜிட்டல் முறையிலேயே நடைபெறுகிறது என்பது குறிப்பிடத்தக்கது.

தற்போது 17 மாநிலங்கள் மற்றும் 4 ஒன்றிய பிரதேசங்களில் 618 கிளைகளுடன் 53 லட்சத்திற்கும் மேற்பட்ட வாடிக்கையாளர்களுக்கு TMB சேவை வழங்கி வருகிறது. எதிர்காலத் தேவைகளைக் கருத்தில் கொண்டு, 2026-27 நிதியாண்டுக்குள் 1,043 பணியாளர்களை ஆட்சேர்ப்பு செய்ய வங்கி திட்டமிட்டுள்ளது.

இது குறித்து வங்கியின் மேலாண்மை இயக்குநர் மற்றும் தலைமை செயல் அதிகாரி சலீ எஸ் நாயர் கூறுகையில், இந்த விரிவாக்கமானது அதிக வளர்ச்சித் திறன் கொண்ட சந்தைகளில் வங்கியின் நிலையை வலுப்படுத்தும் என்றும், முறையான வங்கிச் சேவைகள் மூலம் விவசாயம் மற்றும் சிறு வணிகர்களுக்குத் தேவையான கடன் மற்றும் வைப்புத் தீர்வுகளை வழங்க உதவும் என்றும் தெரிவித்தார்