அமுதாவின் ஆசைகள்-10/ நாடகம்/ கடையம் பாலன்

Amuthavin Aasaikal-10/ Drama By Kadayam Balan

காட்சி 10

இடம்- சாலையோரம்

பங்கேற்பவர்கள்- கைசூப்பி கைலாசம், கருப்பன், முனியன்

====================

கருப்பன்: அண்ணே கைலாசம் அண்ணே.

கைசூப்பி கைலாசம்: என்னல கருப்பா… கிண்டலா?

கருப்பன்: அன்னிக்கு அடிச்ச அடி மறக்கல… அதனாலத்தான் மரியாதையா கூப்பிடறேன்.

கைசூப்பி கைலாசம்: அதுக்கு கிண்டல் பண்ணுற மாதிரில்லா இருக்கு. வழக்கமாக கூப்பிடமாதிரி கைலாசம்ன்னே கூப்பிடு.

கருப்பன்: சரி… கை…

கைலாசம்: என்னல சொன்ன… ( கருப்பனை அடி உதைக்கிறான்).

முனியன்: ஏய்… அடிக்காதே.. அடிக்காதே…

(சண்டையை விலக்கி விடுகிறான்)

என்ன கைலாசம்… கருப்பனைப்போய் இப்படி அடிக்கிறீயே… பாவம் டா….

கைசூப்பி கைலாசம்: அண்ணே என்னை கைசூப்பின்னு சொல்றான்.

முனியன்: அன்னிக்குத்தான் இவங்கிட்ட வாங்கி கட்டினியே… இப்பவும் ஏண்டா கைசூப்பி கைசூப்பின்னு சொல்றே.

கருப்பன்: நான் கைசூப்பின்னு சொல்லல்ல.

கைசூப்பி கைலாசம்: நீ சொல்லன்னு சொல்லு.

கருப்பன்: நான் கைசூப்பின்னு சொல்லவே இல்லை.

கைசூப்பி கைலாசம்: நீ என்னை கைசூப்பின்னுதான் சொன்னே.

கருப்பன்: நான் உண்மையத்தான் சொல்றேன். உன்னை கைசூப்பின்னு சொல்லவே இல்லை.

கைசூப்பி கைலாசம்: சொன்னே.(அடிக்க முயலுகிறான்.)

முனியன்: ஏலே கருப்பா… நீ கைசூப்பின்னு சொன்னியா… இல்லியா….

கருப்பன்: அவன் கைமேலே சத்தியமா நான் சொல்லவே இல்லை.

கைசூப்பி கைலாசம்: பாத்திங்களா அண்ணே… இப்பவும் என் கைமேல சத்தியம்ன்னு சொல்றான்.

கருப்பன்: அண்ணே நம்ம கைலாசம் கையில அட்டை கடிச்சிக்கிட்டு இருக்குன்னு சொன்னேன்.

கைசூப்பி கைலாசம்: அடப்பாவி அதை ஏன் அப்பவே சொல்லல.

கருப்பன்: நான் கைன்னு சொல்றதுக்குள்ள என்னை அடி அடின்னு அடிச்சிட்டியே.

கைசூப்பி கைலாசம்: ஆ வலிக்குதே… என்ன செய்ய.

முனியன்: போய் கொதிக்க வசச்ச தண்ணிய அதுல விடு. அட்டை பூச்சி செத்துடும். ஆமா… அட்டை எங்க வச்சி கடிச்சுது.

கைசூப்பி கைலாசம்: அய்யோ வலிக்குதே… நம்ம ஆளு விமலா இருக்கால்ல.. அய்யோ வலிக்குதே… அவா மரத்துல ஏறி முருக்கக்கா பறிக்கச் சொன்னா. அப்பத்தான் இந்த அட்டை பூச்சி கடிச்சிருக்கணும். அய்யோ வலிக்குதே..

முனியன்: இந்த வலிக்கு ஒரு கைகண்ட மருந்து இருக்கு..  செய்றீயா?

கைசூப்பி கைலாம்: சரி சொல்லுங்க அண்ணே. ஆ வலிக்குதே.

முனியன்: உன்னோட கை விரலை எடுத்து வாயில வை. வலிக்காது.

கைசூப்பி கைலாசம்: அண்ணே கிண்டல் பண்ணாதே.. ஆ…  வலிக்குதே.

முனியன்: கிண்டல் இல்ல-. வாயில வச்சிப்பாரேன்.

கைசூப்பி கைலாசம்: (கை சூப்புகிறான்) ஆமா வலியே இல்லை.

கருப்பன்: அதோ விமலா போறாளே.

கைசூப்பி கைலாசம்: அய்யோ கையையும் எடுக்க முடியல… விமலாவையும் பார்க்க வேணுமே என்ன செய்ய… நான் வர்றேன்.(போகிறான்)

கருப்பன்: அண்ணே நான் கைன்னுதான் சொன்னேன். ஆனா நீங்க கைசூப்பி, கைசூப்பின்னு சொல்ல வைச்சிட்டிங்க.

முனியன்: அதுதாண்டா அய்யா திறமை.

கருப்பன்: அண்ணே அவனையே நான்தான் கைசூப்பின்னு சொல்ல வைக்கணும். அதாவது அவனே அவன கைசூப்பின்னு சொல்லணும். அது உங்களால முடியுமா?

முனியன்: முடியும். பந்தயம் 500 ரூபாய்.

கருப்பன்: சரி.. ஆனா அவனே நான்தான் கைசூப்பின்னு  சொல்லணும்.

முனியன்: சரி.

About Author